Gəncə Şəhər İcra Hakimiyyəti və YAP Gəncə şəhər təşkilatının birgə təşkilatçılığı ilə 20 Sentyabr – Azərbaycan Respublikasının Dövlət Suverenliyi Gününə həsr olunmuş tədbir keçirilib.
Gencexeber.az-a Gəncə Şəhər İcra Hakimiyyətindən verilən məlumata görə, "Konstitusiya və Suverenlik İli" çərçivəsində təşkil olunan tədbirdə YAP Gəncə şəhər təşkilatının sədri Bayram Aslanov, Türkiyənin Gəncədəki Baş konsulu Recep Öztop, Gəncə Şəhər İcra Hakimiyyəti başçısının müavini Adil Tağıyev, Gəncə Tibb Kollecinin direktoru, Əməkdar həkim Mehman Rzayev, bələdiyyə sədrləri, idarə, müəssisə, təşkilat rəhbərləri, şəhid ailələri, müharibə veteranları, partiya fəalları, ictimaiyyət nümayəndələri və gənclər iştirak ediblər.
Əvvəlcə Ulu Öndər Heydər Əliyevin və şəhidlərin xatirəsi bir dəqiqəlik sükutla yad olunub, Dövlət Himni səsləndirilib. Daha sonra Dövlət Suverenliyi Gününə həsr olunmuş videoçarx nümayiş etdirilib.
Adil Tağıyev çıxışında tədbir iştirakçılarını Gəncə Şəhər İcra Hakimiyyətinin başçısı Niyazi Bayramovun adından salamlayaraq təbriklərini çatdırıb. O qeyd edib ki, Azərbaycanın bu günkü gücü Ulu Öndər Heydər Əliyevin uzaqgörən siyasəti və Prezident, Ali Baş Komandan İlham Əliyevin rəhbərliyi nəticəsində formalaşıb. 2023-cü ilin sentyabrında keçirilən lokal antiterror tədbirlərinin Ordumuzun peşəkarlığı ilə Azərbaycanın ərazi bütövlüyünü tam bərpa etdiyini vurğulayıb.
Recep Öztop tədbir iştirakçılarını təbrik edərək xalqlarımızın və dövlətlərimizin qardaşlığını vurğulayıb. O qeyd edib ki, Azərbaycanın ərazi bütövlüyünün və dövlət suverenliyinin təmin olunması ilə başa çatan 44 günlük Vətən müharibəsi ölkələrimiz arasında münasibətlərdə yeni tarixi mərhələ açıb.
Vətən müharibəsi iştirakçısı Mətin Abdinov çıxışında qeyd edib ki, 20 Sentyabr Azərbaycanın dövlətçilik tarixində mühüm mərhələdir. O vurğulayıb ki, bu tarix xalqımızın əzmini və birliyini simvolizə edir və dövlətin davamlı inkişafı üçün hər bir vətəndaş suverenliyin qorunmasına töhfə verməlidir.
Bayram Aslanov çıxışında Prezident İlham Əliyevin Sərəncamı ilə 2025-ci ilin "Konstitusiya və Suverenlik İli" elan olunmasını xatırladıb. O qeyd edib ki, suverenliyimizin bərpası ilə yalnız sərhədlər deyil, həm də milli kimliyimiz bərpa olunub. Bu zəfərin regionda və dünyada ədalətin təntənəsi kimi yadda qalacağını diqqətə çatdırıb.
Tədbir "Ey Vətən!" mahnısının sədaları ilə yekunlaşıb.
