Gəncədə “Yehova şahidləri” dini təriqət üzvləri yenidən aktivləşib.
Bu barədə Gencexeber.az-a müraciət edən şəhər sakini məlumat verib. Bildirilir ki, onlar şəhər küçələrində dolaşaraq qapı-qapı düşür, dini təbliğat xarakterli kitab və jurnallar paylayırlar.
Şahidlər bildirir ki, bu şəxslərdən biri – sarışın, təxminən 45 yaşlarında qadın, digəri isə 60 yaşlarında qarabuğdayı qadın Mahrasa bağı yaşayış massivində bir ailənin ünvanına gələrək "Yehova şahidləri" təliminə dair təbliğat aparıblar. Şikayətçi bildirib ki, qadınlar səlis Azərbaycan dilində danışaraq ailəyə sözügedən dini cərəyanla bağlı jurnal da təqdim ediblər. Hətta söhbət zamanı ailədəki uşaqların sözügedən təlimə əsasən tərbiyə olunmasının vacibliyi vurğulanıb.
Xatırladaq ki, bu dini qrupun üzvləri Gəncədə əvvəllər də oxşar fəaliyyət göstəriblər. 2014-cü ilin iyun ayında “Yehova şahidləri” təriqətinə mənsub 20-dən çox şəxs Gəncə şəhəri Yusif Kosayev küçəsi, ev 31 ünvanında qanunsuz tədbir keçirdikləri üçün hüquq-mühafizə orqanları tərəfindən saxlanılıb.
Qeyd edək ki, “Yehova şahidləri” özlərini məsihçi kimi təqdim edən, protestant yönümlü dini cərəyan hesab olunur. Bu dini təriqət Azərbaycan Respublikasının Dini Qurumlarla İş üzrə Dövlət Komitəsi tərəfindən qeydiyyata alınmayıb. Bu səbəbdən də onların ölkə ərazisində dini təbliğat aparması qanunvericiliyə ziddir.
Sözügedən məsələ ilə bağlı redaksiyamız Daxili İşlər Nazirliyinin mətbuat xidmətinin Gəncə regional qrupuna sorğu ünvanlayıb.
