Ali Məhkəmədə dələduzluq və dələduzluğa cəhddə təqsirləndirilən Gülnar Muradovanın barəsindəki qərardan verilən kassasiya şikayəti üzrə məhkəmə iclası başa çatıb.
Pravda.аz xəbər verir ki, hakim Ələsgər Novruzovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, Gülnar Muradova aldatma və etibardan sui-istifadə etmə yolu ilə müxtəlif şəxslərin əmlakını ələ keçirərək xeyli miqdarda ziyan vurmaqla təkrarən dələduzluq edib.
O, 2020-2021-ci illərdə Göygöl və Gəncədə tanış olduğu şəxsləri aldadaraq onlardan ümumilikdə 43 850 manat pul vəsaitini şəxsi ehtiyaclarına xərcləyib. Təqsirləndirilən şəxs onlara yalandan deyib ki, hüquq-mühafizə orqanlarında yüksək vəzifəli tanışları vasitəsilə istintaq işlərini yüngülləşdirə və zərərçəkmişlərin azadlığa çıxmasına kömək edə bilər. Həmin vədlərə inandıraraq zərərçəkmişlərdən pul almağa nail olub. O, bir sıra hallarda isə məqsədinə çatmaq üçün elektron ödəniş sistemlərindən istifadə edib. Digər zərərçəkmişin ailə üzvlərindən də pul almağa cəhd göstərib. Gəncə Ağır Cinayətlər Məhkəməsi onu 2 il 11 ay 29 gün müddətinə azadlıqdan məhrum edib. Gəncə Apellyasiya Məhkəməsi şikayəti təmin etməyib.
