Gəncədə su təchizatı ilə bağlı ciddi problem yaranıb.
Gencexeber.az-a daxil olan şikayətlərə əsasən, Gəncə şəhəri, Mir Cəlal Paşayev küçəsi, döngə 9, Nəhəng daş bazarının qarşısında yerləşən yaşayış massivində uzun müddətdir ki, içməli su təchizatı yoxdur. Sakinlər bildirirlər ki, məsələ ilə bağlı dəfələrlə müraciət etsələr də, heç bir nəticə əldə olunmayıb.
Sakinlərin sözlərinə görə, onlar bu ünvana köçdükləri vaxtdan bəri ərazinin su ilə təminatını yaxınlıqdakı məktəb həyata keçirib. Lakin son 3 ay ərzində təhsil ocağına da su verilmədiyi üçün əhali tamamilə susuz qalıb.
“Dəfələrlə məsələ ilə bağlı müraciət etmişik. Bizə cavab olaraq bildiriblər ki, guya bu ərazi “Azərsu” ASC tərəfindən qeydə alınmayıb. Bu isə həm qanunvericiliyə, həm də vətəndaş hüquqlarına zidd yanaşmadır. Su insanların ən təməl ehtiyacıdır və dövlət strukturlarının vətəndaşları fasiləsiz, keyfiyyətli içməli su ilə təmin etmək öhdəliyi vardır”, – deyə sakin bildirib.
Onların sözlərinə görə, məcbur qalıb qonşularla birgə şəxsi vəsait hesabına motor alaraq məktəbə təqdim ediblər. Lakin hər dəfə müxtəlif bəhanələr gətirilib: gah “motor xarabdır”, gah “boru partlayıb”. Nəticədə sakinlər üç aydır ki, ən sadə məişət tələbatlarını belə ödəyə bilmirlər.
Şikayətçilər aidiyyəti qurumlardan problemin həllini tələb edirlər.
