Gəncə şəhər M.C.Paşayev adına 39 nömrəli tam orta məktəbin iki 11-ci sinfinin məzunları yüksək nəticə göstərərək hamılıqla ali məktəblərə qəbul olublar.
Gencexeber.az məlumat verir ki, 11 “a” sinfinin rəhbəri, Azərbaycan dili və ədəbiyyat müəllimi Sevda Məmmədova “Azərbaycan müəllimi”nə açıqlamasında bu nailiyyəti məktəbin tarixində xüsusi hadisə adlandırıb.
“Müəllim işləmək çətin, amma çox şərəflidir. Belə şagirdlərlə çalışmaq isə ikiqat qürurvericidir. Bilirəm ki, onların yerini heç bir sinif verə bilməyəcək. Həm valideynləri məsuliyyətli, həm də özləri ağıllı və çalışqan gənclərdir”, – deyə müəllim vurğulayıb.
11 “b” sinfinin rəhbəri, riyaziyyat müəllimi Aygün Abbasova isə bu uğuru müəllim-şagird-valideyn əməkdaşlığının nəticəsi kimi dəyərləndirib.
“Bütün sinfin məzunlarının universitetə qəbul olması təsadüfi deyil, məqsədyönlüdür. Bu, müəllimlərin gərgin əməyi, valideynlərin dəstəyi və şagirdlərin intizamlı hazırlığı sayəsində mümkün olub. Sinifdə zəif şagird yox idi, hamı yüksək nəticə üçün çalışırdı”, – deyə müəllim bildirib.
Qeyd edək ki, Aygün müəllimin nəvəsi Mədinə Babayeva da 11 “a” sinfinin məzunudur. O, 676 bal toplayaraq ADA Universitetinə qəbul olub.
