Gəncənin Mahrasa bağı adlanan yaşayış massivində yerləşən yaşayış binasında sakinlər təhlükəli vəziyyətlə üzləşiblər.
Gencexeber.az-a verilən məlumata görə, söhbət Şota Rustaveli küçəsində, 22 nömrəli tam orta məktəbin qarşısında yerləşən 18 nömrəli beşmərtəbəli yaşayış binasından gedir.
Bildirilib ki, şəhərdə aparılan abadlıq işləri çərçivəsində binanın bloklarında olan köhnə pəncərələr təxminən bir ay əvvəl sökülərək yeniləri ilə əvəz edilib. Lakin yeni çərçivələr quraşdırılsa da, indiyədək onların şüşələri yerinə salınmayıb.
Sakinlərin sözlərinə görə, binanın layihəsinə uyğun olaraq blok pəncərələrinin hər biri həm yuxarı, həm də aşağı mərtəbələrin xeyli hissəsini əhatə edir. Şüşələrin olmaması isə xüsusilə azyaşlı uşaqlar üçün ciddi təhlükə yaradır. Onlar bildirirlər ki, ehtiyatsızlıq nəticəsində bədbəxt hadisənin baş verməsi istisna deyil.
Sakinlər aidiyyəti qurumlardan pəncərələrin şüşələrinin qısa zamanda quraşdırılmasını və yaranmış təhlükənin aradan qaldırılmasını xahiş edirlər.
