Yeni Gəncə qəsəbəsində yerləşən 40A saylı binada lift 10 gündür işləmir.
Sakinlərin Gencexeber.az-a verdiyi məlumata görə, problem yaranan andan etibarən onlar məsələ ilə bağlı Gəncə şəhər Mənzil Kommunal Təsərrüfatı İstehsalat Birliyinin (MKTİB) müvafiq şöbəsinə dəfələrlə müraciət ediblər. Lakin bütün zənglər nəticəsiz qalıb.
"Lift xarab olanda zəng vurduq, bizə dedilər ki, 2-3 günə yeni lift gələcək. Amma artıq 10 gün keçib, hələ də heç bir dəyişiklik yoxdur. İndi zəng vururuq, cavab verirlər ki, nə vaxt gələcəyini bilmirik", – Sakinlərdən biri bildirib.
Onların sözlərinə görə, yaşlı insanların mənzillərinə qalxıb-enməsi çətinləşib. Onlar bildiriblər ki, heç olmasa yeni lift gələnə qədər köhnə liftin müvəqqəti bərpasına icazə verilsin, lakin bu təklif də rədd edilib:
"Dedilər, köhnəni də düzəltmək olmaz, icazəmiz yoxdur. Biz də bilmirik indi necə edək. Yaşlılar var, xəstələr var, çətinlik çəkirik".
Sakinlər aidiyyəti qurumlardan problemin qısa zamanda həllini tələb edirlər.
