Gəncədə yeni fəaliyyətə başlayan "BakuBus" MMC-yə məxsus avtobus yol hərəkəti qaydalarını pozaraq qəza şəraiti yaradıb.
Gencexeber.az-ın məlumatına görə, hadisə Kimyaçılar küçəsi ilə Heydər Əliyev prospektinin kəsişməsində ("Əlillərin dairəsi") qeydə alınıb. Məlumata görə, avtobus "Yol ver" nişanının tələbini kobud şəkildə pozaraq, ikinci dərəcəli yolda olduğu halda, qəfil baş yolla hərəkət edən minik maşının qarşısına çıxıb. Nəticədə qəza təhlükəsi yaranıb.
Baş verənlərə şahidlik edən sürücülərdən biri redaksiyamıza bildirib ki, avtobus sürücüsü hadisə zamanı həyəcanlandığı üçün səhhəti ilə bağlı problem yaşayıb. O əlavə edib ki, bu, ilk belə hal deyil və bəzi avtobus sürücüləri yollarda təhlükəli manevrlər edirlər.
"Bu hal, əfsus, ilk deyil. Bu, digər hərəkət iştirakçıları üçün böyük təhlükə yaradır. Hamını diqqətli olmağa çağırıram", – sürücü bildirib.
