Xəbər verdiyimiz kimi, son günlərdə Gəncə şəhərində ictimai nəqliyyatda ödənişlərlə bağlı bəzi suallar yaranıb.
Gencexeber.az-a citycard.аz-dan verilən məlumata görə, sərnişinlərin kartından eyni gün ərzində iki dəfə pul tutulması halları ilə bağlı gələn müraciətlər araşdırılıb. Bildirilib ki, araşdırma nəticəsində məlum olub ki, bu, bir səfər üçün ikiqat ödəniş deyil, iki fərqli səfərin ödənişidir.
Əlavə edilib ki, bu vəziyyətin səbəbi borc adlı texniki mexanizmdir: "Bu sistem avtobusa mindiyiniz zaman ödəniş sorğusunun sistem tərəfindən dərhal təsdiqlənmədiyi hallarda işə düşür. Bu zaman siz səfərinizi maneəsiz davam etdirə bilərsiniz, lakin ödəniş bir qədər gecikmə ilə ödəniş sistemi tərəfindən təsdiqlənir".
Redaksiyamız tərəfindən paylaşılan ödəniş qəbzi ilə bağlı qeyd olunur ki, 8 oktyabr tarixində sernişin tərəfindən avtobusa minərkən 0.60 qəpik ödəniş edilib. Həmin vaxt sistem borc adlı mexanizmdən istifadə edib. Bu mexanizm ödənişi dərhal sistemdən silmək əvəzinə müvəqqəti borc kimi qeyd edir ki, sərnişin səfərini problemsiz davam etdirə bilsin. Daha sonra ödəniş sistem tərəfindən təsdiq olunaraq borc bağlanır və məbləğ kartdan silinir. Məhz bu səbəbdən 8 oktyabr səfərinin ödənişi 10 oktyabr saat 03:56-da kartdan çıxılıb.
9 oktyabr tarixində eyni kartla edilən növbəti səfərin ödənişi isə dərhal həyata keçirilib və həmin gün 0.60 ₼ tutulub.
Beləliklə, 8 oktyabr, saat 15:54-də edilən ödəniş sistemdə borc kimi saxlanıldığı üçün 10 oktyabr, saat 03:56-da kartdan silinib, 9 oktyabr, saat 18:17-də edilən səfərin ödənişi isə həmin gün, saat 18:18-də həyata keçirilib.
Məbləğlərin eyni (0.60 ₼) olması və tarixlərin bir-birinə yaxın olması səbəbindən bu vəziyyət "ikiqat ödəniş" kimi görünə bilər, lakin iki fərqli səfərin ödənişidir.
Hər bir ödəniş sistemdə RRN adlanan unikal əməliyyat nömrəsi ilə qeyd olunur. Bu kodların fərqli olması, həmin ödənişlərin ayrı-ayrı səfərlərə aid olduğunu göstərir.
