Gəncədə sürücü avtobusun qapısını açıq vəziyyətdə idarə edib.
Gencexeber.az məlumat verir ki, Gəncə şəhəri ərazisində hərəkət edən 6 saylı marşrut xəttində təhlükəli vəziyyət müşahidə olunub. Redaksiyamıza daxil olan şikayətə əsasən, sürücü avtobusun qapısını 15-20 dəqiqə ərzində açıq vəziyyətdə saxlayıb.
Belə ki, sürücü bir neçə dayanacaq boyunca bu vəziyyətdə nəqliyyat vasitəsini hərəkət etdirib və yalnız sonradan qapını bağlamağı "xatırlayıb". Həmin müddətdə avtobus bir neçə dəfə dayanıb, eləcə də qəfil əyləcdən istifadə edilib. Belə vəziyyətdə sərnişinlərin, xüsusən də qapının qarşısında dayananların nəqliyyat vasitəsindən düşmə riski yaranıb.
Yol-nəqliyyat təhlükəsizliyi baxımından bu cür məsuliyyətsiz davranış ciddi fəsadlara yol aça bilər. Sərnişinlər sürücüləri daha diqqətli olmağa və aidiyyəti qurumları nəzarəti gücləndirməyə çağırırlar.
