Xüsusi amansızlıqla qətl törətməkdə təqsirləndirilən Ruslan Şirinovun barəsindəki qərardan yenidən kassasiya şikayəti verilib.
Pravda.аz xəbər verir ki, şikayət Ali Məhkəmədə araşdırılacaq.
Gəncə Ağır Cinayətlər Məhkəməsinin hökmü ilə o, 16 il müddətinə azadlıqdan məhrum edilib. Gəncə Apellyasiya Məhkəməsi hökmü dəyişdirib. Ruslan Şirinovun ittiham edildiyi Cinayət Məcəlləsinin 120.2.4-cü (xüsusi amansızlıqla adam öldürmə) maddəsi həmin Məcəllənin 120.1-ci (qəsdən adam öldürmə) maddəsinə tövsif olunub və cəzası 10 il 6 aya endirilib. Ali Məhkəmə isə şikayəti təmin etməyib.
İttihama görə, hadisə 2023-cü ilin martında Gəncə şəhərində yerləşən marketlər şəbəkəsindən birində qeydə alınıb.
Belə ki, Ruslan Şirinov 2014-cü ildə uzaq qohumu olan 1995-ci il təvəllüdlü Züleyxa ilə ailə qurub, onların 2 övladı dünyaya gəlib. 2020-ci ildən etibarən isə cütlüyün münasibətləri tədricən pozulub.
Həmin ərəfədə Züleyxa Bakıda yaşadıqları evi tərk edərək Gəncədə anasının yanına köçüb. Lakin Ruslan Züleyxa ilə əlaqəni kəsməyib. Bir müddət sonra keçmiş xanımının Gəncədə marketlər şəbəkəsindən birində çalışmasını öyrənən Ruslan Şirinov onun işdən çıxmasını tələb edib. Barışmaq və işdən çıxmaqla bağlı tələblərinin yerinə yetirilmədiyini görən şəxs daha sonra bıçaq götürərək Züleyxanın iş yerinə gedib. O, marketə daxil olaraq heç bir söhbət etmədən hücum edərək insanların gözü qarşısında Züleyxaya 16 bıçaq zərbəsi endirib. Qadın aldığı xəsarətlərdən hadisə yerində ölüb.
Onun barəsində Cinayət Məcəlləsinin 120.2.4-cü (xüsusi amansızlıqla adam öldürmə) maddəsi ilə ittiham irəli sürülmüşdü.
