Gəncənin müxtəlif ərazilərində ağaclarla bağlı problemlər yaşanır.
Gencexeber.az-a daxil olan çoxsaylı şikayətlərə əsasən, Gəncədə yaşıllıqlara qarşı diqqətsizlik və baxımsızlıq sakinlərin ciddi narazılığına səbəb olub. Belə ki, Mustafa Sübhi küçəsində, 20 nömrəli məktəbin arxasında aparılan asfaltlama işləri zamanı yolun kənarındakı ağaclar kəsilərək birbaşa yaşayış evinin qarşısına atılıb. Sakinlərin sözlərinə görə, artıq bir həftədir kəsilmiş ağaclar olduğu kimi qalır və gediş-gəlişə ciddi maneə yaradır.
Digər bir narazılıq isə C.Şıxlinski küçəsi, döngə 1, ev 4 ünvanındadır. Şikayətçilər bildirir ki, ərazidə küknar ağacı təhlükə mənbəyinə çevrilib. Onların sözlərinə görə, ağac hər an aşıb faciəyə səbəb ola bilər.
Bundan əlavə, şəhər üzrə ümumilikdə ağacların baxımsız vəziyyətdə olması da gündəmdədir. Sakinlər iddia edir ki, yay aylarında ağacların suvarılması üçün xüsusi su maşınları ayrılırdı. Lakin son illərdə bu proses dayandırılıb. Nəticədə ağaclar qurumağa başlayıb. Bu hal əsasən Heydər Əliyev prospektində, eyni zamanda, demək olar ki, bütün şəhərdə müşahidə olunur.
Sakinlər məsələ ilə bağlı aidiyyəti qurumlardan təcili tədbir görülməsini tələb edirlər.
