Gəncədə 9 yaşlı uşaq küçə itlərinin hücumuna məruz qalıb.
Gencexeber.az-ın məlumatına görə, bu gün səhər saatlarında Gəncə şəhərində xoşagəlməz hadisə baş verib. Belə ki, İ.Qayıbov adına 1 nömrəli tam orta məktəbin cəmi 30 metrliyində 2016-cı il təvəllüdlü U. İbrahimzadəyə 9 sahibsiz it hücum edib.
Dördüncü sinif şagirdi təhsil ocağına gedərkən hücuma məruz qalıb. Hadisə şahidləri dərhal uşağa yardım edərək itləri qovmağa nail olublar. Zərərçəkmiş uşaq təcili tibbi yardım avtomobili ilə 3 nömrəli şəhər poliklinikası çatdırılıb.
Həkimlərin nəzarətinə götürülən U.İbrahimzadəyə quduzluğa qarşı 3 doza vaksin vurulub. Hazırda onun vəziyyəti kafidir.
Məktəblərin yaxınlığında baş verən bu hal valideynlər və sakinlər arasında ciddi narahatlıq yaradıb. Sözügedən uşağın valideyni aidiyyəti qurumlardan məsələnin həlli üçün təxirəsalınmaz addımların atılmasını tələb edir.
"Ətrafda heç kim olmasa idi necə olacaqdı? Kim cavab verəcəkdi? Şəhərdə itlərin əlindən tərpənmək olmur. İndi də əlimizdə zopa ilə məktəbə uşaq aparmalı vəziyyətə çatmışıq", – qəzəbli valideyn bildirib.
