Gəncə şəhərində məcburi köçkün ailəsinin yaşadığı evdə baş verən yanğın nəticəsində ailə üzvləri çətin vəziyyətə düşüb.
Gencexeber.az-a müraciət edən Kəlbəcər rayonunun Susuzluq kənd sakini Lətif Sabir oğlu Yaqubovun Gəncə şəhərində 650 ailəlik qəsəbədə müvəqqəti yaşadığı 2 otaqlı evdə 17 fevral 2026-cı il tarixində yanğın hadisəsi baş verib. Nəticədə tikili tamamilə yanaraq yararsız vəziyyətə düşüb. Evdə olan bütün məişət əşyaları və vacib sənədlər külə dönüb.
Ailə başçısının sözlərinə görə, hazırda o, həyat yoldaşı, oğlu, gəlini və azyaşlı nəvəsi ilə birlikdə – ümumilikdə 5 nəfər – tamamilə sığınacaqsız qalıb. Yanğından sonra keçən bir ay ərzində ailə müxtəlif qohumlarının evində qalaraq çətin şəraitdə həyatını davam etdirir.
Zərərçəkən bildirir ki, məcburi köçkün ailəsi kimi dövlət tərəfindən ayrılmış evin yanması onların vəziyyətini daha da ağırlaşdırıb.
Ailə üzvləri aidiyyəti qurumlara – Kəlbəcər Rayon İcra Hakimiyyətinə, Qaçqınların və Məcburi Köçkünlərin İşləri üzrə Dövlət Komitəsinə və digər təşkilatlara müraciət etdiklərini qeyd ediblər.
Onlar hazırkı ağır sosial vəziyyətləri nəzərə alınaraq, ailəyə təcili müvəqqəti sığınacaq verilməsini və dəymiş ziyanın aradan qaldırılması üçün köməklik göstərilməsini xahiş edirlər.
