Gəncədə minlərlə sakin qəzalı vəziyyətdə olan binalarda yaşamağa məcburdur.
Gencexeber.az məlumat verir ki, şəhərdə ümumilikdə 4683 nəfər qəzalı vəziyyətdə olan 19 binada məskunlaşıb. Məlumata görə, sözügedən tikililərin əksəriyyəti yataqxana tipli binalardır.
Gəncə şəhər Mənzil Kommunal Təsərrüfatı İstehsalat Birliyindən redaksiyamıza bildirilib ki, qəzalı vəziyyətdə olan bu binalar 1623 otaqdan ibarətdir.
Məsələ ilə bağlı Fövqəladə Hallar Nazirliyinin rəsmiləri tərəfindən müvafiq ünvanlarda baxış keçirilib. Aparılan yoxlamalar zamanı binaların texniki vəziyyəti qiymətləndirilib. Nazirliyin rəyinə əsasən, həmin tikililərin istismar müddəti artıq başa çatıb. Eyni zamanda, binaların böyük qisminin yaşayış üçün tam yararsız vəziyyətdə olduğu müəyyən edilib.
"Gəncə şəhərinin Nizami və Kimyaçılar küçəsinin kəsişməsində 3 ədəd 9 mərtəbəli, 1 ədəd 10 mərtəbəli 249 mənzildən ibarət olan yaşayış kompleksi inşa edilmişdir. Qəzalı yataqxanalarda yaşayan sakinlərin bir hissəsinin yaxın vaxtlarda, həmin binalara köçürülərək, mənzil şəraitinin yaxışlaşdırılmasına nail olunacaqdır. Yerdə qalan digər yataqxanalarda yaşayan sakinlərimizin sosial, məişət, həmçinin mənzil şəraitinin yaxışlaşdırılması üçün müvafiq tədbirlər görülməkdədir" - qurum tərəfindən qeyd olunur.
