Gəncədə sahibsiz itlərin hücumu nəticəsində qadın xəsarət alıb.
Gencexeber.az-ın məlumatına görə, hadisə avqustun 5-i saat 19:00 radələrində şəhərin 5-ci mikrorayon ərazisində, “stadion” adlanan uşaq meydançasının yaxınlığında baş verib.
1969-cu il təvəllüdlü Abdullayeva Fatma İkram qızına dörd sahibsiz it hücum edib. Qadın yerə yıxılaraq müxtəlif bədən xəsarətləri alıb.
Yaralı dərhal Gəncə şəhər 3 nömrəli poliklinikasına çatdırılıb. Müayinə zamanı onun biləyində çat aşkarlanıb və əli gipsə qoyulub. Ayağına tikiş qoyulub, bədəninin bir neçə hissəsində isə zədələr, sıyrıqlar aşkarlanıb. Hazırda qadın ambulator müalicə alır.
Məlumata görə, Fatma Abdullayeva şəkər xəstəsidir və bu səbəbdən yaralarının sağalması uzun zaman tələb edir.
Ərazi sakinləri bildirirlər ki, bu, qadına qarşı sahibsiz itlərin ikinci hücumudur. Onların sözlərinə görə, həmin ərazi – Gəncə şəhər 7 nömrəli tam orta məktəbin yaxınlığı – uşaqların dərsə getdiyi marşrutda yerləşir və sahibsiz itlər səbəbindən uşaqların hərəkəti də təhlükə altındadır.
Faktla bağlı aidiyyəti qurumlara məlumat verilib.
