Gəncə şəhər M.A. Abbaszadə adına 20 nömrəli tam orta məktəbin 11A sinfinin 1990-cı il məzunları 25 ildən sonra yenidən bir araya gəliblər.
Gencexeber.az məlumat verir ki, tədbir iştirakçıları əvvəlcə məktəbin qarşısında toplaşıblar. Sinif otağında hər kəs 25 il əvvəl əyləşdiyi yerlərdə oturub, sinif rəhbərləri Abbasova Nazilə müəlliməni dinləyiblər. Təqaüddə olan pedaqoq çıxışında kövrək anlar yaşayıb, bu cür mənalı görüşə görə məzunlara təşəkkürünü bildirib. Görüşdə həmçinin fənn müəllimləri Mustafayev Fizuli, Ələkbərov Qoşqar, Ələkbərova Məlahət və Nağıyeva Sima da iştirak ediblər.
Tədbir zamanı Vətən uğrunda canından keçmiş şəhidlər və dünyasını dəyişmiş müəllimlər bir dəqiqəlik sükutla yad edilib.
Daha sonra iştirakçılar əvvəlcədən bəzədilmiş restoranda görüşü davam etdiriblər. Burada 1990-cı ildən və 2025-ci ildən olan fotolardan ibarət “ilk addımlar” mövzusunda qalereya nümayiş olunub. Hər məzun bu stend önündə tək-tək şəkil çəkdirib, keçmişi xatırlayıb, duyğulu anlar yaşayıb.
Görüş zamanı məzunlar və müəllimlər o illərlə bağlı xatirələrini bölüşüb, məktəb dövrünü əks etdirən foto və video slaydlar izlənilib. Tədbir yüksək əhval-ruhiyyə və səmimi ab-hava ilə başa çatıb.
