Gəncə şəhəri, Heydər Əliyev prospektində yerləşən 1, 2, 3 və 4 saylı binalarda yaşayan sakinlər ərazinin illərdir baxımsızlığından şikayətlənirlər.
Gencexber.az-a məhəllənin sakinləri tərəfindən bildirilib ki, həyəti alaq otları basıb, kanalizasiya xətləri açıq vəziyyətdə qalıb, bir vaxtlar sakinlərə xidmət edən mərasim evi isə sökülüb.
Əlavə edilib ki, vətəndaşlar məişət tullantılarının yaratdığı üfunətdən əziyyət çəkirlər. Binaların qarşısında toplanan tullantılar vaxtında daşınmır, bir hissəsi isə illərdir həmin ərazidə qalıb.
Sakinlərin sözlərinə görə, vəziyyətlə bağlı dəfələrlə aidiyyəti qurumlara müraciət edilib, hətta video görüntülər də göndərilib. Lakin verilən vədlər yalnız söz olaraq qalıb, real tədbir görülməyib.
Qeyd edək ki, sözügedən yaşayış binaları şəhərin əsas prospektinin cəmi bir addımlığında yerləşir. Maraqlıdır ki, qonşuluqdakı daxili yollar asfaltlanıb, lakin burada vəziyyət tam fərqlidir. Nəticədə 200-dən artıq ailənin yaşadığı bu massivdə məişət tullantıları və biganə münasibət səbəbindən ciddi sanitar və ekoloji problem yaranıb.
Ətraflı Gencexeber.az-ın süjetində.
