Gəncə şəhərində inventarlaşdırılmış və nişanlanmış quru, həmçinin bioloji inkişafdan qalmış ağacların götürülməsi işləri davam etdirilir.
Gencexeber.az bildirir ki, Mənzil Kommunal Təsərrüfatı İstehsalat Birliyinin (MKTİB) Yaşıllaşdırma şöbəsinin əməkdaşları və texnikaları vasitəsilə bu günə qədər Heydər Əliyev və Nizami Gəncəvi prospektində, Məmməd Bürcəliyev küçəsindəki parkda, Dəmiryolçular parkında, Təbriz küçəsində, Poçt qəsəbəsində, Mirzə Abbas Abbaszadə küçəsində və digər müxtəlif ərazilərdə ümumilikdə 146 ağac kəsilərək götürülüb.
Xatırladaq ki, şəhərin küçə, prospekt və parklarında qeydiyyata alınaraq inventarlaşdırılmış və nişanlanmış 500-dən çox quru və qəzalı ağac müəyyən olunub. Gəncə şəhərində, quru və qəzalı ağacların götürülməsi və onların yerinə yeni ağacların əkilməsi işləri Ekologiya və Təbii Sərvətlər Nazirliyinin aidiyyəti qurumlarının iştirakı ilə Gəncə Şəhər İcra Hakimiyyəti MKTİB-nin Yaşıllaşdırma şöbəsinin əməkdaşları tərəfindən qurumun texnikası vasitəsilə həyata keçirilir.
