2025-ci ilin ilk yarısında Gəncədə 301 milyon manatlıq sənaye məhsulu istehsal olunub.
Gencexeber.az-a Gəncə Şəhər Statistika İdarəsindən verilən məlumata əsasən, Gəncə şəhərində 2025-ci ilin yanvar–iyun ayları ərzində fəaliyyət göstərən sənaye müəssisələri və fiziki şəxslər tərəfindən ümumilikdə 301,5 milyon manatlıq sənaye məhsulu istehsal olunub və sənaye xarakterli xidmətlər göstərilib.
Hesabat dövründə istehsalın 20,4 faizi (61,4 milyon manat) dövlət sektoruna, 79,6 faizi (240,1 milyon manat) isə qeyri-dövlət sektoruna aid olub.
Emal sənayesində üstünlük qeyri-dövlət sektorundadır
Emal sənayesi üzrə istehsalın ümumi dəyəri 265,8 milyon manat təşkil edib. Bunun 239,0 milyon manatı (89,9%) qeyri-dövlət sektorunun payına düşüb.
Əsas məhsul istiqamətləri üzrə bölünmə belədir:
Qida məhsulları – 66,5 milyon manat
İçkilər – 9,7 milyon manat
Metallurgiya sənayesi məhsulları – 130,1 milyon manat
Avtomobil və qoşqu istehsalı – 26,7 milyon manat
Digər sənaye məhsulları – 32,8 milyon manat
İstehsal olunan məhsullar
Altı ay ərzində şəhərdə istehsal olunan bəzi əsas məhsullar aşağıdakılardır:
Un – 45,8 min ton
Araq – 115,61 min dekalitr
Şərab – 57,4 min dekalitr
Traktor – 271 ədəd
MAZ markalı yük avtomobili – 106 ədəd
Emal edilməmiş alüminium ərintiləri – 11 493,54 ton
Elektron sayğaclar – 5 478 ədəd
Mexaniki su və qaz sayğacları – 248 768 ədəd
Enerji və su təchizatı sahələri
Gəncədə elektrik enerjisi, qaz və buxar təchizatı sahəsində 22,9 milyon manatlıq, su təchizatı və tullantıların emalı sahəsində isə 12 milyon manatlıq məhsul və xidmət istehsal olunub.
