Gəncədə 10 nömrəli marşrut xəttində sürücülərin sərnişinlərdən artırılmış gedişhaqqı tələb etməsi ilə bağlı redaksiyamıza çoxsaylı şikayətlər daxil olub.
Gencexeber.az-ın məlumatına görə, ölkə ərazisində müasir tələblərə cavab verən və yalnız nağdsız ödəniş sistemi ilə fəaliyyət göstərən şəhərdaxili, qəsəbələrarası və şəhərətrafı avtobuslarda yeni tariflər təsdiqlənib. Qərara əsasən, məsafədən asılı olaraq dəyişən tariflərin aşağı həddi 60 qəpik olaraq müəyyənləşdirilib. Tariflər oktyabrın 1-dən qüvvəyə minib.
Lakin Gəncə şəhərində fəaliyyət göstərən 10 nömrəli marşrut xəttində nağdsız ödəniş sistemi tətbiq olunmur. Sərnişinlər yalnız nağd pul ödəməklə gediş edə bilirlər. Şikayətlərə görə, sürücülər sərnişinlərdən qanuni olaraq 50 qəpik müəyyən edilən haqq əvəzinə 60 qəpik tələb edirlər. Bu isə müvafiq qaydalara ziddir və süni qiymət artımı kimi qiymətləndirilir.
Sərnişinlər tərəfindən redaksiyamıza bildirilib ki, sürücülər nəqliyyat vasitələrinin daxilində əvvəlcə "60 qəpik" yazılmış elanlar asıb, lakin sonradan onları götürüblər.
"Sürücülər əvvəl "60 qəpik" plakatı qoymuşdu, sonra götürdülər ki, heç kim xəbər tutmasın. Amma hamıdan 60 qəpik almağa davam edirlər. 50 qəpik verəndə sürücülər narazılıq edir, sərnişinlərin arxasınca söyürlər", - narazı sərnişin bildirib.
Qeyd edək ki, Gəncədə yalnız "BakuBus" MMC-yə məxsus avtobuslarda, həmçinin 2 və 8 nömrəli marşrut xətlərində nağdsız ödəniş sistemi tətbiq olunur. Yalnız bu marşrutlarda yeni tariflər qüvvəyə minib. Digər marşrut xətlərində, o cümlədən 10 nömrəli marşrutda əvvəlki tariflərin artırılması qanunsuzdur.
