Gəncənin "Totanlı 600" adlanan ərazisində, Gəncə çayın yaxınlığında yaşayan sakinlər illərdir yol problemi ilə üz-üzədirlər.
Gencexeber.az-a şikayət ünvanlayan sakinlərin sözlərinə görə, artıq 10 ildir bu ərazidə yol infrastrukturu ilə bağlı heç bir iş görülməyib.
Sakinlər bildirirlər ki, indiyədək yolları öz imkanları hesabına təmir etməyə çalışıblar:
"Lakin vəziyyət o qədər acınacaqlı hal alıb ki, artıq nə taksilər, nə də təcili tibbi yardım maşınları küçələrə daxil ola bilir. Yağış yağanda uşaqlar məktəbə getmək üçün iki ayaqqabıdan istifadə edirlər. Yoldakı vəziyyət bu qədər acınacaqlıdır. Yerli qurumların biganəliyi problemi hər il böyüdüb bu həddə çatdırıb".
Əhali Gəncə rəhbərliyindən dərhal tədbir görülməsini, yolların təcili şəkildə bərpa olunmasını tələb edir.
