Gəncədə sahibsiz itlərin kütləvi şəkildə zəhərləndiyi ilə bağlı iddialar gündəmə gəlib.
Gencexeber.az-a daxil olan çoxsaylı şikayətlərə əsasən, şəhərin Gəncə Dəmiryol Stansiyası, eləcə də “Sərçə” bazarı yaxınlığında – 10-dan çox sahibsiz küçə iti cansız olaraq aşkarlanıb.
Hadisə şahidlərinin sözlərinə görə, heyvanların bədənində zəhərlənməyə işarə edən əlamətlər müşahidə olunub. Bəzi itlərin ağız və burun nahiyələrində köpüklənmə, habelə qusuntu izləri olduğu iddia edilir. Bu isə onların zəhərli maddə qəbul etdikləri ehtimalını gücləndirir.
Sakinlər bildirirlər ki, son günlər həmin ərazilərdə sahibsiz itlərin sayında kəskin azalma müşahidə olunub. Sakinlər bu vəziyyətdən narahat olduqlarını bildiriblər.
Hadisənin kim və ya kimlər tərəfindən törədildiyi barədə heç bir məlumat yoxdur.
Xatırladaq ki, son illər ölkənin bir sıra şəhər və rayonlarında sahibsiz heyvanların kütləvi zəhərlənməsi ilə bağlı oxşar hallar qeydə alınıb. Gəncədə heyvansevərlər bu cür hadisələri qəbuledilməz adlandırıblar.
