Gəncədə aparılan genişmiqyaslı iməcilik aksiyasının budəfəki ünvanı Gəncəçay olub.
Gencexeber.az bildirir ki, Mənzil Kommunal Təsərrüfatı İstehsalat Birliyinin (MKTİB) canlı qüvvəsi tərəfindən çayın təbii səbəblərdən və ərazidə yaşayan sakinlər tərəfindən daha çox çirkləndirilən ərazilərində təmizlik işləri aparılıb.
Belə ki, çayın məcrası boyu məişət tullantıları, ağac qırıntıları, kol-kos, alaq otları bir yerə yığılaraq ərazidən daşınması təmin edilib. Çayın sağ və sol sahilində mövcud zibil konteynerlərinin ətrafında səliqə-sahman yaradılıb.
Gəncə şəhər MKTİB Gəncəçayın ətrafında yaşayan sakinlərdən və iaşə obyektlərindən, restoran və kafe sahiblərindən bir daha xahiş edir ki, şəhərimizin təmizliyinin qorunub saxlanılmasına dəstək nümayiş etdirərək, məişət tullantılarını çayın ərazisinə deyil, bunun üçün təyin olunmuş konteynerlərə və ya zibil qutularına atsınlar. Əks halda bu kimi vətəndaşlar aşkar edilərək inzibati qaydada məsuliyyətə cəlb olunacaqlar.
