Bu gün tanınmış ictimai xadim, ziyalı və pedaqoq Aslan Məmməd oğlu Abbasovun vəfatından dörd il ötür.
Gencexeber.az məlumat verir ki, Aslan Abbasov 1950-ci il martın 11-də Gəncə şəhərində dünyaya gəlib. Azərbaycan Dövlət Neft və Kimya İnstitutunun kimya texnologiyası fakültəsini bitirib. Mərhum ömrü boyu ölkənin ictimai-siyasi və elmi həyatında fəal rol oynayıb.
Belə ki, o, Azərbaycan SSR Ali Sovetinin XII çağırış deputatı, eləcə də Kəpəz seçki dairəsindən Milli Məclisin I çağırış deputatı kimi fəaliyyət göstərib. Parlamentdə İnsan Hüquqları Daimi Komissiyasının sədr müavini vəzifəsini də icra edib. Uzun illər Yeni Azərbaycan Partiyasının Səbail rayon təşkilatında Siyasi Şura üzvü olub. Həmçinin 2016–2019-cu illərdə Azərbaycan Texnologiya Universitetində Prorektoru vəzifəsində çalışıb.
Aslan Abbasov 2021-ci il iyunun 11-də Bakı şəhərində dünyasını dəyişib və doğma Gəncə şəhərində ailə məzarlığında dəfn olunub. Mərhum ailəli idi, üç övladı var.
