Gəncə şəhərində bir neçə gündür yağan yağışlar fəsadsız ötüşməyib.
Gencexeber.az-ın məlumatına görə, Məhsəti qəsəbəsi daha çox ziyan çəkən ərazilərdən biri olub. Burada sel suları evlərə dolub, həyətyanı sahələrə ziyan vurub. Sakinlər bildirirlər ki, hazırda ciddi çətinliklərlə üz-üzə qalıblar. Onlar aidiyyəti qurumların əraziyə cəlb olunmasını gözləyirlər.
Fəsadlardan biri də 2 saylı Gəncə "ASAN xidmət" mərkəzinin qarşısından Sevinc qəsəbəsinə aparan əsas yolda qeydə alınıb. Yol tamamilə su altında qaldığı üçün hərəkət mümkünsüz hala düşüb. Sakinlərin sözlərinə görə, bu vəziyyət hər il təkrarlansa da, aidiyyəti qurumlar məsələ ilə bağlı heç bir tədbir görməyib. Nəticədə hətta bir neçə avtomobilin dövlət qeydiyyat nişanı suya düşərək itib.
Təbii fəlakətin yaşandığı digər problemli ünvanlardan biri isə Bayan küçəsi, 1-ci döngə olub. Burada 7 yaşayış evini su basıb. Sakinlər vəziyyətin ağır olduğunu bildirir və təcili tədbirlərin görülməsini tələb edirlər.
Ümumilikdə, şəhərin müxtəlif ərazilərində yaranan bu vəziyyət sakinlər arasında ciddi narazılıq doğurub. Onların sözlərinə görə, hər dəfə yağan güclü yağışdan sonra oxşar mənzərə təkrarlanır.
