Gəncə şəhərinin Ozan küçəsində uzun müddətdir davam edən problem sakinləri təngə gətirib.
Gencexeber.az-ın məlumatına görə, təqribən 5 ay əvvəl burada yerləşən artezian quyusu sökülüb, lakin borular hələ də küçə boyunca səpələnmiş vəziyyətdə qalır. Köhnə quyudan isə fasiləsiz şəkildə su qaynayır və bu, küçənin palçıq içində qalmasına səbəb olur. Nəticədə ərazidə hərəkət çətinləşib, avtomobillər və piyadalar üçün ciddi maneələr yaranıb.
Sakinlərin sözlərinə görə, problemin aradan qaldırılması üçün Gəncə şəhər Sukanal İdarəsinə dəfələrlə müraciət olunub. Əvvəllər onlara "bu gün-sabah gəlirik" deyilərək vədlər verilsə də, artıq 20 gündür heç bir tədbir görülməyib. Son günlər isə ümumiyyətlə müraciətlərə cavab verilmir.
Vətəndaşlar bildirirlər ki, vəziyyətin bu şəkildə davam etməsi onların səbir kasasını daşırıb. Hətta onlar boruların ərazidən götürüləcəyi təqdirdə digər təmir işlərini öz hesablarına görməyə razı olduqlarını da deyirlər.
Sakinlər aidiyyəti qurumlardan problemin dərhal həllini tələb edirlər.
