Gəncədə Mahrasa bağı yaşayış massivində yerləşən 16 nömrəli binanın qarşısına yeni asfalt örtüyü çəkilib. Lakin çəkilən asfalt qatının çox nazik olması və ərazinin yalnız bir hissəsinin asfaltlanması narazılıq yaradıb.
Gencexeber.az-a şikayət ünvanlayan sakinlər bildirirlər ki, yolun bir hissəsində işlər görülsə də, binanın qarşısında bir çox yerlər asfaltlanmadan qalıb.
Onlar qeyd edirlər ki, bu vəziyyət həm piyadaların, həm də nəqliyyat vasitələrinin hərəkətini çətinləşdirir.
"Asfalt çox nazik və yarımçıq şəkildədir. Yağış yağanda bu asfalt da yuyulub gedəcək. Binanın qarşısı isə tamamilə bataqlığa çevriləcək," – deyə ərazidə yaşayan sakinlərdən biri bildirib.
Sakinlər məsələ ilə bağlı aidiyyəti qurumlardan ərazidə tam və keyfiyyətli asfaltlama işlərinin aparılmasını tələb edirlər.
