Xəbər verdiyimiz kimi, Gəncə şəhərinin mərkəzində geniş ərazi uzun müddət ərzində faktiki olaraq "zibil poliqonu"na çevrilmişdi.
Məsələ ilə bağlı Gencexeber.az tərəfindən məlumat dərc edildikdən qısa müddət sonra sözügedən ərazidə Gəncə şəhər Mənzil Kommunal Təsərrüfatı İstehsalat Birliyinin (MKTİB) canlı qüvvəsi və xüsusi texnikaları vasitəsilə genişmiqyaslı təmizlik işləri aparılıb. Qurum tərəfindən bildirilib ki, Mirzə Abbas Abbaszadə və Əşrəf Yusifzadə küçələrinin ərazisində qazılmış iri xəndək məsuliyyətsiz vətəndaşlar tərəfindən uzun müddət ərzində müxtəlif məişət tullantıları ilə çirkləndirilib.
Lakin Gencexeber.az-a müraciət edən sakinlərin iddiasına görə, Azərbaycan Dövlət Aqrar Universitetinin arxasında, İsmət Qayıbov adına 1 nömrəli tam orta məktəbin birbaşa qarşısında yerləşən həmin ərazi təmizlik işlərindən qısa müddət sonra yenidən zibillənib.
Maraqlıdır ki, sakinlərin sözlərinə görə, ərazini çirkləndirən şəxs məhz Gəncə şəhərində təmizlik işlərinə cavabdeh olan qurumun – Mənzil Kommunal Təsərrüfatı İstehsalat Birliyinin əməkdaşıdır.
İddia olunur ki, bu gün səhər saatlarından etibarən qoşqulu motosiklet vasitəsilə sözügedən əraziyə aramsız şəkildə müxtəlif məişət tullantıları daşınaraq atılıb. Ərazidə yaşayan sakinlər nəqliyyat vasitəsinin sürücüsünə irad bildirdikdə, o, özünü MKTİB-in əməkdaşı kimi təqdim edib. Bu "işlərin" isə çalışdığı qurumun rəhbəri Nurəhməd Əhmədovun tapşırığı əsasında həyata keçirdiyini, eləcə də "haraya tapşırılıbsa, tullantıları da ora atıram" bildirib.
Sakinlər şəhərin mərkəzinin bu gedişatla zibil poliqonuna çevrilə biləcəyini bildirdikdə isə sürücünün "Atıram, yaxşı edirəm" cavabını verdiyi iddia olunur.
Məsələ ilə bağlı Gəncə Şəhər İcra Hakimiyyətinin Mənzil Kommunal Təsərrüfatı İstehsalat Birliyinə rəsmi sorğu ünvanlanıb.
