Gəncədə taksilər avtobusların yolunu kəsir.
Gencexeber.az-a daxil olan çoxsaylı şikayətlərə görə, Gəncə şəhərində Heydər Əliyev prospekti ilə Həsən Əliyev küçəsinin kəsişməsində yerləşən "Gəncə Mall" ticarət və istirahət mərkəzinin qarşısında və üzbəüz taksi avtomobillərinin dayanması ciddi problem yaradıb.
Belə ki, taksilər avtobus dayanacağının qarşısında və yaxınlığında park edildiyi üçün ictimai nəqliyyat vasitələrinin dayanacağa maneəsiz daxil olmasına imkan vermirlər. Bu isə həm sərnişinlərin minib-düşməsini çətinləşdirir, həm də digər hərəkət iştirakçıları üçün əlavə maneə yaradır.
Qeyd edək ki, yolun sözügedən hissəsində dayanma və durma qadağandır. Ərazidə bunu göstərən müvafiq yol nişanı quraşdırılsa da, bəzi taksi sürücüləri qadağaya əməl etmirlər.
Nəticədə ərazidə nəqliyyatın hərəkəti çətinləşir, qəza şəraiti yaranır. Bundan başqa, sürücülərin bu davranışı cəmiyyətdə qəbul olunmuş nəzakət və qarşılıqlı hörmət qaydalarını da kobud şəkildə pozulmasına səbəb olur.
