Son aylarda Gəncə sakinləri arasında Bayraq Meydanında dövlət bayrağının olmaması ilə bağlı suallar artıb.
Gencexeber.az-ın mövzu ilə bağlı sorğusuna cavab olaraq Gəncə Şəhər İcra Hakimiyyətindən (ŞİH) bildirilib ki, hazırda “Gəncəçay” Park-Bulvar Kompleksində genişmiqyaslı təmir və yenidənqurma işləri aparılır. Bu səbəbdən Bayraq Meydanındakı bayraq müvəqqəti olaraq endirilib.
“Bildiyiniz kimi, III MDB İdman Oyunları ilə əlaqədar olaraq, möhtərəm Prezident cənab İlham Əliyevin tapşırığına əsasən Gəncə şəhərində genişmiqyaslı təmir-tikinti və abadlıq işləri həyata keçirilir. Görülən işlər şəhərin bir sıra meydanlarını, park və xiyabanlarını da əhatə edir. Hazırda “Gəncəçay” Park-Bulvar Kompleksində, eləcə də burada yerləşən Bayraq Meydanında təmir və yenidənqurma işləri aparılır. Bayraq Meydanının təmiri və burada quraşdırılmış dirəyin rənglənməsi ilə əlaqədar olaraq, bayraq müvəqqəti olaraq çıxarılmışdır. Gəncə şəhərinin Bayraq meydanında təmir işləri yekunlaşdıqdan sonra üçrəngli dövlət rəmzimiz təkrar asılacaqdır” - Gəncə ŞİH-dən bildirib.
