Azərbaycan mətbuatının tanınmış simalarından biri, yazıçı və alim Sabir Gəncəli 93 yaşında dünyasını dəyişib.
Gencexeber.az məlumat verir ki, Sabir Süleyman oğlu Məmmədov (Sabir Gəncəli) bu gün vəfat edib. Mərhum Bakı şəhərinin Hövsan qəsəbəsinin qəbiristanlığında torpağa tapşırılıb.
Qeyd edək ki, Sabir Süleyman oğlu Məmmədov 1932-ci il iyulun 26-da Gəncədə anadan olub. M.Ə.Sabir adına orta məktəbi (indiki 5 nömrəli tam orta məktəb) və Azərbaycan Dövlət Universitetinin filologiya fakültəsinin jurnalistika şöbəsini bitirib. Peşəkar fəaliyyətinə 1958-ci ildə başlayan Sabir Gəncəli müxtəlif qəzet və jurnallarda – o cümlədən “Azərbaycan qadını” jurnalında uzun illər məsul vəzifələrdə çalışıb. Eləcə də “Fermer”, “Vəfa”, “Cik-Cik”, “Səhnə” və “Dəli Kür” kimi nəşrlərin formalaşmasında yaxından iştirak edib.
O, 2000–2014-cü illərdə Azərbaycanın İctimai-Siyasi Universitetində professor kimi “Azərbaycan mətbuat tarixi” və “Jurnalistika sənətkarlığı” fənlərini tədris edib.
Sabir Gəncəli maarifçilik və qadın hüquqları sahəsində geniş tədqiqatlar aparıb. 1000-dən çox publisistik yazı və tarixi oçerkin, 20-dən artıq kitabın, o cümlədən ensiklopedik topluların müəllifidir.
O, ilk dəfə olaraq milli mədəniyyətin görkəmli simaları – Hacı Zeynalabdin Tağıyev, Əhməd bəy Ağaoğlu, Əli bəy Hüseynzadə, Şəfiqə Əfəndizadə, Həmidə Cavanşir, Səkinə Axundzadə və Zərifə Əliyeva kimi ziyalıların həyat və fəaliyyətini geniş işıqlandırıb.
Azərbaycan mətbuatının inkişafındakı xidmətlərinə görə Sabir Gəncəli 2015-ci ildə Prezident İlham Əliyevin sərəncamı ilə “Tərəqqi” medalı ilə təltif olunub. O, həmçinin iki dəfə “Qızıl qələm” mükafatına layiq görülüb, beynəlxalq və yerli səviyyədə müxtəlif fəxri diplomlarla təltif edilib.
Sabir Gəncəli ömrünü maarifçilik, publisistika və mətbuatın inkişafına həsr etmiş ziyalı kimi yadda qalacaq. Allah rəhmət etsin.
