Xəbər verdiyimiz kimi, Azərbaycan universitetləri arasında ilk dəfə olaraq Gəncə Dövlət Universiteti (GDU) WURI (The World University Rankings for Innovations – www.wuri.world) reytinq sistemində 16 kateqoriyadan biri olan “A8. Qlobal çağırışlara DİM-əsaslı cavablar (A8. SDG-Based Responses to Global Challenges)” üzrə ilk 100 universitet siyahısına daxil olub.
Gencexeber.az bildirir ki, Gəncə Dövlət Universitetinə müfaviq sertifikat təqdim olunub.
Reytinqin nəticələri 12 iyul 2025-ci ildə Filippində keçirilən “WURI – 2025 Hibrid Konfransı”nda açıqlanıb. Qiymətləndirmə prosesinə isə Gəncə Dövlət Universitetinin əməkdaşları mütəxəssis kimi cəlb edilib.
Universitet müsabiqəyə Dayanıqlı Ağıllı Şəhərlər və Regionlar Mərkəzinin tərəfdaşlığı ilə hazırlanmış Gəncə Yaşıl Şəhər Fəaliyyət Planına verdiyi töhfələr əsasında müraciət edib. Plan Avropa Yenidənqurma və İnkişaf Bankı, Qafqaz Regional Ekoloji Mərkəzi, İngiltərənin Atkins Realis təşkilatı və Gəncə Dövlət Universitetindən ibarət konsorsium tərəfindən tərtib olunub. 15 illik plan çirklənmiş ərazilərin təmizlənməsi, enerji səmərəliliyinin artırılması, yaşıl ərazilərin salınması, ictimai nəqliyyat şəbəkəsinin, su və kanalizasiya infrastrukturunun qurulması, tullantıların idarə olunması kimi sahələri əhatə edir. Universitet əməkdaşları layihənin yerli koordinatoru kimi çıxış edib.
Müsabiqəyə 87 ölkədən 1253 universitet 16 kateqoriya üzrə 4866 layihə ilə müraciət edib.
