Gəncədə fəaliyyət göstərən təhsil müəssisəsi və Türkiyənin Atatürk Universiteti əməkdaşlığa başlayır. Bu haqda 13 yanvar tarixində Gəncə Dövlət Universitetinə istinadən məlumat veririk.
Belə ki, Gəncə Dövlət Universiteti ilə Türkiyənin Atatürk Universiteti arasında əməkdaşlıq haqqında Memorandum imzalanıb. Memoranduma görə, hər iki universitet arasında təhsil, mədəni və elmi tədqiqatlar sahəsində əməkdaşlığın qurulması, tələbə və müəllimlərin mübadiləsi, eləcə də birgə elmi tədqiqatlar və konfransların təşkil olunması nəzərdə tutulur. Bütün bunlar hər iki universitetin müəllim və tələbələri üçün təhsil və elm sahəsində yeni imkanlar yaradacaq.
Qeyd edək ki, Türkiyənin Ərzurum şəhərində yerləşən Atatürk Universiteti qardaş ölkə üzrə 2-ci ən böyük kampusa sahib olan ali təhsil ocağıdır. Hazırda Atatürk Universitetində 17 fakültə, 5 yüksək məktəb, 15 peşə məktəbi, 6 institut və 16 araşdırma mərkəzi fəaliyyət göstərir, həmçinin universitetin öz xəstəxanası da vardır.
