Azərbaycan Respublikası Elm və Təhsil Nazirliyinin Yüksək Texnologiyalar Parkının təşəbbüsü və təşkilatçılığı, Təhsilin İnkişafı Fondu və “SABAH.HUB” İnnovasiya Mərkəzinin tərəfdaşlığı ilə həyata keçirilən “Texnologiyaların transferi” proqramının nəticələri açıqlanıb.
Gencexeber.az bildirir ki, layihə çərçivəsində ümumilikdə 76 müraciət qəbul olunub. Texniki ekspertiza mərhələsini uğurla keçən 17 layihə növbəti mərhələyə vəsiqə qazanıb.
Bu mərhələdə müstəqil ekspertlərlə müsahibələr təşkil olunub və layihələr elmi əsaslandırma, texnologiyanın tətbiqi mümkünlüyü, mövcud həllərlə müqayisədə innovativliyi, sənayenin real problemlərini həll etmə qabiliyyəti və bazarda mövcud həllərlə müqayisədə üstünlükləri kimi meyarlar üzrə dəyərləndirilib.
Qiymətləndirmə nəticəsində 5 layihə qalib elan olunub. Qalib layihələrdən biri də Gəncə Dövlət Universitetinin İnnovasiyalar departamenti tərəfindən təqdim edilmiş universitet əməkdaşı Vidadi Bayramova məxsus olan “Tura qurğusu” layihəsidir.
“Texnologiyaların transferi” proqramına təqdim olunan qurğu istixanalarda, istirahət mərkəzlərində və şənlik evlərində atmosferə atılan zərərli hissəcikləri aradan qaldırır və əmələ gələn xoşagəlməz qoxunun qarşısını alır.
Qalib komandalar texnoloji həllərinin kommersiyalaşdırılması üçün zəruri dəstək və məsləhət xidmətləri ilə təmin olunacaqlar.
