Redaksiyamıza Natavan qəsəbəsində Milli Qəhrəman Ənvər Arazovun adını daşıyan küçənin, eləcə də Sevinc qəsəbəsində 10-cu küçənin sakinlərindən çoxsaylı şikayətlər daxil olub.
Gencexeber.az məlumat verir ki, sözügedən ərazilərdə yaşayan vətəndaşlar uzun illərdir asfaltlama işlərinin aparılmamasından, yağışlı havada piyadaların hərəkətinin əsl problemə çevrilməsindən narazıdırlar.
Əsas narazılıqlardan biri də Ənvər Arazov küçəsində yaşayış binalarına su verən borunun partlaması olub. Nəticədə yolun onsuz da dəhşətli vəziyyətini daha da ağırlaşdıran nəhəng gölməçələr əmələ gəlib: "Biz evə necə çatacağımızı bilmirik. Hər yağış yağanda küçələr çaylara çevrilir."
Tikinti işlərinin aparıldığı 10-cu küçədə də vəziyyət bundan yaxşı deyil. Bu ərazidə torpaq yola tökülür. Qeyri-sabit hava durumunda bu sahə piyadaların hərəkəti üçün əlverişsiz olur.
Sakinlər aidiyyəti qurumlardan yollarda asfaltlanma işlərinin aparılmasını xahiş edirlər.
