Gəncənin 1-ci mikrorayonunda həyətlərin abadlaşdırılması işləri icra edilib. Bir çox binaların qarşısında uşaqlar üçün yeni oyun meydançaları quraşdırılıb.
Gencexeber.az məlumat verir ki, abadlıqda müsbət dəyişikliklər olsa da, əminliklə demək olar ki, bu, mikrorayonun hərtərəfli inkişafı üçün kifayət etmir. Nəzərə alınmayan ən mühüm element gənclər üçün idman ləvazimatlarının yetərsizliyidir.
Söhbət paralel tirlər və dartınmaq hərəkətlərinin icra edilməsi üçün nəzərdə tutulan turniklərdən gedir. Bu elementlərin yeniyetmələrin sağlamlıqlarını qorumaq üçün vacibliyini nəzərə alsaq, həyətlərin abadlaşdırılmasına bu cür yanaşma ciddi çatışmazlıqdır.
İdman qurğularının olmaması gəncləri idmanla məşğul olmaq imkanından məhrum etməklə yanaşı, onların ümumi sağlamlıqlarının pisləşməsinə də səbəb olur. Yeniyetmələr üçün idmanın əhəmiyyəti danılmazdır - bu, təkcə fiziki hazırlığa deyil, həm də sağlam vərdişlərin formalaşmasına kömək edir, zərərli vərdişlərə əla alternativdir.
Bundan əlavə, Gəncə məhəllələrində idman infrastrukturunun yaradılması gənclərdə idmana marağın stimullaşdırılması istiqamətində mühüm addıma çevrilə bilərdi.
Cavid Şəmiyev
