Gəncədə yuxarı siniflərdə oxuyan məktəb şagirdi ilə bağlı həyəcanlı vəziyyət yaranıb.
Gencexeber.az-a daxil olan şikayətlərə əsasən, Gəncə şəhər 31 nömrəli tam orta məktəbin Elçin adlı 10-cu sinif şagirdi təhsil ocağının daxilində nümayişkaranə şəkildə siqaret çəkir, digər yeniyetmələri təhqir edir, məktəbdə qarşıdurma və aqressiya mühiti yaradır.
İddialara görə, bu, adıçəkilən şəxsin törətdiyi əməllərin hamısı deyil. Elçin “TikTok” sosial şəbəkəsindəki hesabında canlı yayımlar aparır və burada qaydalara məhəl qoymadığını gizlətmir. O, nizam-intizam və əxlaq normalarına tamamilə etinasızlıq nümayiş etdirərək, ona bildirilən iradlara “heç kim mənə heç nə edə bilməz” deyə qərəzli fikirlər söyləyir.
Səsləndirilən digər iddialara görə, Elçin dərsdən sonra məktəbdə qalır, “TikTok” üçün qadağan olunmuş məzmunu lentə alır. Sözügedən hal nəinki məktəblərdə qəbul edilən davranış qaydalarını pozur, həm də şəhərimizin təhsil müəssisələrinin reputasiyasına ləkə salır.
Şikayətçilər onun qaydalara etinasız münasibəti və cəza qorxusunun olmamasına görə ətrafdakılarda yanlış cəzasızlıq hissi yaratdığını söyləyib, digər uşaqları da oxşar hərəkətlərə sövq etməsi təhlükəsinin olduğunu bildiriblər.
Sözügedən məsələ ilə bağlı redaksiyamız Gəncə-Daşkəsən Regional Təhsil İdarəsinə və Daxili İşlər Nazirliyinin mətbuat xidmətinin Gəncə regional qrupuna sorğu ünvanlayıb.
Cavid Şəmiyev
