Xəbər verdiyimiz kimi, Gəncənin Aida İmanquliyeva küçəsində yerləşən 2 saylı binanın sakinləri yaşadıqları qəzalı tikili barədə müvafiq addımların atılmamasından şikayət edirlər.
Gencexeber.az məlumat verir ki, 2020-ci il oktyabrın 17-də Ermənistan silahlı qüvvələri tərəfindən Gəncəyə endirilən zərbə nəticəsində zədələnən bu binada həyatlarını davam etdirən sakinlərin şikayətlərinə Gəncə Şəhər İcra Hakimiyyətindən reaksiya verilib.
Qurumdan bildirilib ki, “2020-ci il sentyabr ayının 27-dən başlayaraq Ermənistan Respublikası silahlı qüvvələrinin Azərbaycan Respublikasının ərazisinə təcavüzü nəticəsində mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi və aradan qaldırılması ilə bağlı tədbirlər haqqında” Azərbaycan Respublikası Prezidentinin 06.11.2020-ci il tarixli 2292 nömrəli Sərəncamının təmin edilməsi ilə bağlı Azərbaycan Respublikası Nazirlər Kabinetinin 2020-ci il 11 noyabr tarixli 612s nömrəli Sərəncamı ilə Dövlət Komissiyasının işinin təşkil edilməsi məqsədilə aidiyyəti dövlət orqanlarının (qurumlarının) nümayəndələrindən ibarət İşçi qrupları yaradılıb:
“Təcavüz nəticəsində dəymiş ziyanın aradan qaldırılması işləri Dövlət Şəhərsalma və Arxitektura Komitəsinə həvalə edilib.
İşçi qrup tərəfindən Aida İmanquliyeva küçəsi, bina 2 ünvanında yerləşən mənzillərə də baxış keçirilib, burada yaşayan ev sahiblərinin imzası ilə texniki baxış aktı tərtib edilib. Tərtib edilən aktlara əsasən mənzillərin təmiri nəzərdə tutulub”.
Cavid Şəmiyev
