Gəncənin yeni asfaltlanmış küçəsində sürətlə hərəkət edən avtomobillər piyadaların dincini əlindən alıb.
Gencexeber.az məlumat verir ki, Bursa küçəsinin asfalt örtüyü bu yaxınlarda yenilənib. Lakin yerli hakimiyyət orqanına minnətdarlıqlarını bildirən sakinlər yeni problemlə qarşılaşdıqlarını söyləyirlər.
Vətəndaşlar hərəkətin təhlükəsizliyini təmin etmək üçün burada tramplinlərin quraşdırılmasını istəyirlər. Maraqlı məqam bundan ibarətdir ki, təxminən bir kilometr uzunluğu olan Bursa küçəsi ilə kəsişən köməkçi yolun üç hissəsində sürət maneələri mövcuddur.
Həmçinin ərazidə yeganə asfaltlanmış küçə olduğundan, əksər nəqliyyat vasitələri oradan keçir. Yaxşı yol şəraiti və maneələrin olmaması hərəkət sürətinin əhəmiyyətli dərəcədə artması ilə nəticələnir.
“Yeni asfalt sürətin artmasına səbəb olub. Sürücülərə irad bildiriləndə isə axır vaxtlar davalar da olur” – sakin söyləyib.
Burada yaşayanların iddiasına görə, elektron qaydada bir neçə dəfə Gəncə Şəhər İcra Hakimiyyətinin qəbuluna yazılsalar da, onlara cavab verən olmayıb. Sakinlər vəziyyətin daha ciddi nəticələrə səbəb ola biləcəyindən ehtiyat edir və aidiyyəti qurumları küçədə təhlükəsizliyi təmin etmək üçün tədbirlər görməyə çağırırlar.
