Sənaye və Texnologiyalar üzrə Gəncə Dövlət Peşə Təhsil Mərkəzinin tələbələri təqaüd ala bilmədiklərindən şikayətçidirlər.
Bununla bağlı Gencexeber.az-a tələbələr tərəfindən şikayət ünvanlanıb. Şikayətçilər Sənaye və Texnologiyalar üzrə Gəncə Dövlət Peşə Təhsil Mərkəzinin I kurs tələbələrinə təqaüd ödənilmədiyini qeyd ediblər:
“Sənaye və Texnologiyalar üzrə Gəncə Dövlət Peşə Təhsil Mərkəzinin I kurs tələbələriyik. Hər kəs Yeni il ərəfəsində tələbə təqaüdünü aldı. Yalnız I kurslara verilmədi.
Səbəbini soruşanda isə dedilər ki, pul qurtardı, sizinkiləri ödəyə bilmirik. Hərə bir söz deyir. Ortada heç nə yoxdur. Əziyyət çəkirik. Ailəsindən uzaqda qalan, o təqaüdə göz dikən tələbələr var. Hər gün nə zaman olacağını soruşanda veriləcəyini deyirlər. Lakin nəticə yoxdur”.
Məsələ ilə bağlı Gencexeber.az-ın əməkdaşı Sənaye və Texnologiyalar üzrə Gəncə Dövlət Peşə Təhsil Mərkəzi ilə əlaqə saxlamağa çalışsa da, zənglərimiz cavabsız qalıb.
Nəzrin Vahid
