Gəncədə bir nəfərin ölümü, təqsirli bilinən şəxsin isə 15 il azadlıqdan məhrum edilməsi ilə nəticələnən cinayətin detalları açıqlanıb.
Musavat.cоm xəbər verir ki, hadisə avtomobil qapısının digər maşına dəyməsi səbəbindən başlayıb. Köhnə avtomobil bazarının qarşısında Nicat Dajban avtomobilindəki ov bıçağı ilə Mirağa Əliyevə dörd zərbə endirib. Onlardan biri zərərçəkənin ürəyinə tuş gələrək həyatına son qoyub.
Nicat Gəncə Ağır Cinayətlər Məhkəməsinin hökmü ilə 16 il 6 ay müddətinə azadlıqdan məhrum edilib. Narazı qalan təqsirləndirilənin vəkili Gəncə Apellyasiya Məhkəməsinə üz tutub. Nəticədə onun cəzası yüngülləşdirilərək 9 ilə endirilib.
Qərardan prokuror və mərhumun ailə üzvləri narazı qalaraq Ali Məhkəməyə üz tutublar. Şikayət əsaslı hesab edilib və iş yenidən Gəncə Apellyasiya Məhkəməsinə qaytarılıb.
Bu dəfə isə Nicatın cəzası ağırlaşdırılıb. Onun cəzası 15 il olaraq hesablanıb.
Son olaraq Ali məhkəmədə Nicat barəsində çıxarılmış 15 il azadlıqdan məhrum etmə cəzası qüvvədə saxlanılıb.
