Mərkəzi Qan Bankının Gəncə bölməsinin binası acınacaqlı vəziyyətdədir.
Gencexeber.az məlumat verir ki, Anton Çexov küçəsində yerləşən qurumun adıçəkilən şöbəsinin binası ilə bağlı kritik vəziyyət yaranıb. Talassemiya və digər qan xəstəliklərindən əziyyət çəkən uşaqların müalicə olunduğu bu tibb ocağının yerləşdiyi tikilidə tavanlar qəzalı haldadır. Yağış yağanda su binanın daxilinə axır.
“14 ildir ki, ayda iki dəfə bu mərkəzə gedirəm. Binanın vəziyyəti dəhşətlidir. Xəstə uşaqlar bu cür müalicəyə layiq deyillər”, – uşağının daimi qanköçürməsinə ehtiyacı olan valideynlərdən biri bildirib.
Həmçinin ötən ayın sonunda binalardan birinin divarı da uçub. Şəhər sakinləri təcili tədbirlər görülməsinə ehtiyac olduğunu deyərək faciənin baş verə biləcəyindən gileylənirlər: "Tikili kiminsə başına düşməsə heç kim hərəkətə keçməyəcək?"
Əlavə edilib ki, həyatı vacib prosedurlara ehtiyacı olan uşaqları təhlükəsiz və rahat mühitlə təmin etmək üçün təcili müdaxilə tələb olunur.
Qeyd edək ki, 2020-ci ildə Vətən Müharibəsi dövründə cəbhənin ehtiyacları üçün qan ehtiyatı məhz bu mərkəzdə yığılıb. Mərkəzi Qan Bankının Gəncə bölməsi təkcə Gəncə deyil, Azərbaycanın qərb bölgəsinə xidmət edir.
