Gəncədə söyüş üstündə qadın sevgilisini bıçaqlayıb.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsinin hakimi Roman Ələkbərlinin sədrliyi ilə keçirilib.
Belə ki, 1987-ci ildə Gürcüstanda anadan olmuş Nəzakət Məmmədovanın (ad şərtidir) Qabil Əliyev ilə (ad şərtidir) qeyri-rəsmi ər-arvad münasibəti olub. Nəzakət dekabrın 24-ü Gəncə şəhərində yaşadığı evdə Qabillə görüşüb. Onlar yemək yeyib, spirtli içki qəbul ediblər. Hər ikisi sərxoş vəziyyətdə olarkən Nəzakətin telefonuna rəfiqəsi zəng edib. O, telefonu açmayanda Qabil Nəzakətin başqa kişilərlə danışmasından şübhələnib. Qabilin qısqanclığı tutaraq ona qarşı nalayiq ifadələr işlədib, söyüb təhqir edib. Nəzakət bundan əsəbiləşərək stolun üzərində olan bıçaqla Qabili vurub.
Nəzakət Məmmədova Azərbaycan Respublikası CM-nin 126.1-ci maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nəzakət Məmmədova özünü təqsirli bilib. İfadəsində göstərib:
“Qabillə qeyri-rəsmi ər-arvad münasibətimiz var. O, yaşadığım evə tez-tez gəlib-gedirdi. Hadisə günü Qabil yenə mənim evimə gəldi. Yemək yeyib, spirtli içki qəbul edəcəkdik. Mən yemək hazırlayarkən telefonuma zəng gəldi. Həmin zəngi açmadım. Sonra dəfələrlə zəng gəlməyə davam etdi. Qabil zənglərə görə çox əsəbiləşdi, qısqanmağa başladı. Aramızda bunun üstündə mübahisə baş verdi. Qabil yanlış düşündüyün başa düşsün deyə zəngə cavab verdim. Amma yenə də mənə inanmadı, söyməyə başladı. Söyüşlərə dözə bilməyib bıçaqladım”.
Məhkəmə baxışı zamanı iş üzrə zərərçəkmiş Qabil Əliyev ifadə verib:
“Uzun illərdir ki, Nəzakəti tanıyıram. Qeyri-rəsmi ər-arvad kimi yaşayırıq. Nəzakətin yaşadığı evə bazarlıq edib, nə lazımdırsa alıb verirəm. Hadisə baş verən günü yemək üçün onlara getdim. Nəzakət yemək hazırlayarkən zəng gəldi. Zəng edənin kim olduğunu soruşarkən rəfiqəsi Qahirə olduğunu dedi. Zəng dayanmadı. Əsəbiləşdim, aramızda mübahisə yarandı. Mübahisə zamanı Nəzakəti söydüm. Bu zaman Nəzakət stolun üstündən götürdüyü mətbəx bıçağı ilə bir dəfə kürəyimdən vurdu. Məhkəmədən ona yüngül cəza verilməsini istəyirəm”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nəzakət Məmmədova 3 il müddətində azadlıqdan məhrum edilib.
Əsmər Sənani
