Gəncədə bina sakinləri liftin ləng işləməsindən əziyyət çəkirlər.
Gencexeber.az məlumat verir ki, Yeni Gəncə qəsəbəsində yerləşən 19 saylı binanın 2-ci blokunun sakinləri 1 ildən artıqdır ki, ləng işləyən lift problemi ilə üzləşiblər. Lift yavaş-yavaş hərəkət edir və qapıları xeyli müddətdən sonra açılır.
"Bir il əvvəl liftimiz xarab oldu. Birinci mərtəbədə dayanmaq əvəzinə zirzəmiyə düşürdü. Bu barədə aidiyyəti üzrə məlumat verdik və gələn mütəxəssislər problemin liftin idarəetmə lövhəsində (plata) olduğunu bildirdilər. Elektron cihazın yenisi olmadığından o, bir müddətlik köhnə və ləng işləyəni ilə əvəz edildi. Lakin bu günədək bizə vəd edilən yeni plata quraşdırılmayıb”.
Sakinlər qeyd edir ki, lift nəinki yavaş hərəkət edir, hətta qapılar da gecikmə ilə açılır. Bu, xüsusilə sağlamlıq problemləri olan yaşlı insanlar üçün narahatlıq yaradır.
Bununla bağlı həmin blokda yaşayanlar Gəncə Şəhər İcra Hakimiyyətinin rəhbəri Niyazi Bayramova ərizə ünvanlayıblar. Onlar iddia edirlər ki, müraciətlərinə qurumdan rəsmi cavab almayıblar.
Sakinlər əlavə ediblər ki, lift idarəsi sakinlərin borcuna görə təmir işlərinin görünmədiyini bildirib.
“Lift idarəsinin işçiləri dedilər ki, liftin istismarına görə borcumuz yığılıb, bu səbəbdən də təmir etmirlər. Amma əksər sakinlər deyirlər ki, borcları yoxdur. Belə məsuliyyətsizliyə görə niyə biz əziyyət çəkməliyik?”
Vəziyyəti aydın şəkildə nümayiş etdirmək üçün sakinlərdən biri problemli və birinci blokda olan liftlərin daxilində qurğuların necə işləmələrini videoya çəkib. Görüntülərdən aydın olur ki, qonşu blokdakı lift 30 saniyəyə 9-cu mərtəbədən 1-ci mərtəbəyə enir və dərhal qapıları açılır. 2-ci blokdakı lift isə eyni əməliyyatı 1 dəqiqə 10 saniyəyə icra edir.
Liftin vəziyyəti bir çox insanlara narahatlıq yaratmaqda davam etdiyindən bina sakinləri problemin tezliklə həllinə ümid edirlər.
