Gəncədə Heydər Əliyev prospektində və onunla kəsişən əsas və köməkçi yolların asfalt örtüyünün yenilənməsi davam etdirilir. Lakin heç də bütün sakinlər nəticələrdən razı deyil.
Gencexeber.az məlumat verir ki, işlər 20 nömrəli tam orta məktəbin yaxınlığında aparılıb. Müvafiq idarənin texnikası qısa müddətdə geniş ərazidə asfalt örtüyünün yenilənməsinə nail olub. Buna baxmayaraq, ikinci dərəcəli və cəmi 200 metr uzunluğunda olan Teymur Hacıyev küçəsinin sakinləri yollarının vəziyyətindən narazı qalırlar.
Yerli sakinlərin sözlərinə görə, burada sonuncu dəfə 1962-ci ildə asfalt salınıb. Qonşu küçələr təmir edilsə də, onların yaşadığı ərazi lazımi diqqətdən kənarda qalıb və bu da insanların haqlı narazılığına səbəb olub.
