Goranboy rayonunda qurumuş ağacların yerinə yeniləri əkilib. Bəs bu səpkidə işlər Gəncədə görülürmü?
Gencexeber.az-a son zamanlar Gəncə sakinlərindən daxil olan şikayətlər şəhərin müxtəlif ərazilərində ağacların quruması problemindən xəbər verir. Yerli sakinlər iddia edirlər ki, yaşıllaşdırma tədbirləri çərçivəsində əkilmiş bir çox bitki lazımi qulluq və suvarma olmadığından zamanla məhv olur. Bu problem yalnız gənc bitkilərə deyil, həm də canlılığını itirən yetkin ağaclara təsir göstərir.
Redaksiyamızın məlumatına görə, sözügedən problemin həll olunması istiqamətində Goranboy rayonunda təkcə ötən il 840 ədəd şam, 7 mindən çox gül kolları,1600-dən artıq alyandıra, 30-dan artıq zeytun və 245 xan çinarı əkilib.
Şikayətçilər Gəncədə yaşıllıqların vəziyyəti ilə bağlı şəhər rəhbərliyini bitkilərə müntəzəm qulluq edilməsinə və onların normal böyüməsi üçün şəraitin yaradılması istiqamətində tədbirlərin görülməsinə çağırırlar.
Qeyd edək ki, Mənzil Kommunal Təsərrüfatı İstehsalat Birliyinin Yaşıllaşdırma şöbəsi tərəfindən son aylarda bir neçə dəfə mövsümü güllərin əkini həyata keçirilib. Ayrıca qurum şəhər ərazisində yaşıllıq sahələrinə aqrotexniki qulluq göstərilməsinə dair ictimaiyyəti məlumatlandırır.
