Gəncə sakinləri 1992-1993-cü illərdən qalma sınıq-salxaq avtobusların fəaliyyət göstərməsindən şikayətçidir.
Hüriyyət.аz-a bununla bağlı sakinlər şikayət ünvanlayıb.
Onlar bildirir ki, köhnə avtobusların içləri xarici görünüşlərindən də bərbad gündədir:
“İçəridə qazın və kirin iyindən oturmaq mümkün deyil. Eyni zamanda dayanacaqlar da bərbad gündədir. Kim harada istəyir, orada da avtobusu saxlatdırır. Bildiyiniz kimi, Gəncə Azərbaycanın ikinci böyük şəhəridir. Lakin burda vəziyyət ürəkaçan deyil. İş yox, nəqliyyat bərbad gündə, yollar dağılır. Bir sözlə, şəhər baxımsız vəziyyətdədir.
Gəncə şəhərində 3-4 yeni avtobus var ki, onların daxili və xarici görünüşləri normaldır, amma onlar da vaxtla əlaqədar olaraq təhlükəli idarə edirlər. Əhalini fikirləşən yoxdur. Üstəlik, yararsız avtobuslarda gediş haqqının 50 qəpik olması da çoxdur.
Daha bir vacib məsələ isə odur ki, axşam saat 8-dən sonra şəhərdə avtobus tapmaq mümkün olmur. Yerüstü Nəqliyyat Agentliyindən xahiş edirik, bu yaman günlü avtobusları şəhərdən çıxarsınlar”.
Məsələ ilə bağlı açıqlama verən Yerüstü Nəqliyyat Agentliyinin mətbuat xidməti bildirib ki, regionlarda ictimai nəqliyyatda sərnişinlərə göstərilən xidmətlərin təhlükəsizlik və keyfiyyət baxımından yüksək standartlara çatdırılması məqsədilə marşrut xətləri təhlil edilir və avtobus parkının yenilənməsi diqqət mərkəzində saxlanılır:
“Daşıyıcı şirkətlər qarşısında sərnişindaşıma tələblərinə cavab verməyən o cümlədən köhnə, istismara yararsız avtobusların yeniləri ilə əvəzlənməsi ilə bağlı tapşırıqlar qoyulur. Hazırda ölkənin bütün rayon və şəhərlərinin nəqliyyat şəbəkəsi geniş təhlil olunur və nəticələrə uyğun olaraq marşrut xətləri mərhələli qaydada müsabiqəyə təqdim edilir. Müsabiqənin şərtlərindən biri də avtobusların daha yeni olmasıdır.
Qeyd edək ki, Gəncə şəhərində ictimai nəqliyyat şəbəkəsinin optimallaşması, avtobus parkının yenilənməsi, sərnişindaşıma keyfiyyətinin yaxşılaşdırılması və sərnişin məmnunluğuna nail olunması istiqamətində sərnişindaşımaya 18 yeni və müasir avtobus cəlb edilib. 58-60 sərnişin tutumlu avtobuslar 2018-ci ilin istehsalıdır və ekoloji təmiz avro-6 standartlarına cavab verir. Avtobusların yenilənməsi mərhələli şəkildə davam etdiriləcək”.
[caption id="attachment_75915" align="alignnone" width="953"]
[/caption]
[caption id="attachment_75916" align="alignnone" width="908"]
[/caption]
