Gəncə şəhərindəki Park-bulvar ərazisi bərbat vəziyyətdədir.
Gencexeber.az-a bu barədə şəhər sakinləri müraciət ediblər.
Bildirilir ki, 2017-ci ildə əhalinin istifadəsinə verilən park-bulvar kompleksi baxımsız vəziyyətdədir:
“Dekorativ döşəmələrdə çökmə əmələ gəlib, bu da təhlükəsizlik baxımından ciddi problem yaradır. Bulvar ərazisində axşam saatlarında işıqlandırılma olmur. Bura insanların gəzməsi, istirahət etməsi üçündürsə, bəs işıqlandırma sistemi nə üçün işləmir? İnsanların parkda rahat oturub dincəlməsi üçün vacib olan oturacaqlar da sıradan çıxıb. Bütün bu məsələlərin həlli üçün park-bulvar ərazisinin təmirə və bərpa işlərinə ehtiyac var. Gəncə sakinləri olaraq aidiyyəti qurumlardan bulvarın təmir olunmasını tələb edirik”.
Başqa bir problem isə parkdan məişət tullantılarına açılan “mənzərədir”. Gəncə çayı ətrafındakı və digər sahələrdəki tullantılar, həm şəhərin təmizliyinə, həm də gözəlliyinə ciddi təsir edir.
