Bu gün gəncəli yazıçı Sahib İbrahimlinin doğum günüdür. Bu haqda Gencexeber.az 17 aprel tarixində məlumat verir.
Sahib Axundov 17 aprel 1952-ci ildə Gəncədə anadan olub. O, ilk təhsilini 8 saylı, sonra isə 1 saylı Gəncə şəhər məktəblərində alıb. 1968-1973-cü illərdə Gəncə Dövlət Universitetində oxuyub. O, Sahib İbrahimli təxəllüsü ilə tanınır. İbrahimli 1976-1980-ci illərdə AMEA-nın Nizami adına Ədəbiyyat İnstitutunun aspiranturasında təhsil alıb.
Yazıçı 1982-1994-cü illərdə AMEA-nın Gəncə Bölməsində elmi işçi kimi çalışıb. O, 1989-1992-ci illərdə Azərbaycan kənd təsərrüfatı Akademiyasının “Kadr uğrunda” qəzetinin müxbiri olub. İbrahimli 1995-ci ildən indiki Azərbaycan Dövlət Aqrar Universitetinin Azərbaycan ədəbiyyatı kafedrasının dosenti, həmçinin Azərbaycan Mədəniyyət İşçiləri Həmkarlar İttifaqı Gəncə şəhər komitəsinin sədridir.
Sahib İbrahimli “Qasımbəy Zakirin poetikası”, “Əhməd Cavadın həyat və yaradıcılığının Gəncə dövrü”, “Elm fədaisi” əsərlərinin, həmçinin söz ustası Aşıq Ələsgərin yaradıcılığına həsr olunmuş bir monoqrafiyanın, 100-ə qədər elmi məqalənin və 10-dan çox kitabın müəllifidir. O, Mirzə Şəfi Vazehin “Divani Hikmət” ədəbi məclisini bərpa edənlərdən biridir.
İbrahimli 1989-cu ildən Azərbaycan Jurnalistlər Birliyinin, 1992-ci ildən isə Azərbaycan Yazıçılar Birliyinin üzvüdür. O, Azərbaycanın Əməkdar mədəniyyət işçisidir. Yazıçı 2015-ci ildə Prezident təqaüdünə layiq görülüb.
